سكت الكلام

-



سكت الكلام والقلب ويا العقل تاه
والدنيا زحمة ..وفي الزحام مليون حكاية للحياة
مليون حكاية..وفي الحكاية ألف قصة وألف جرح وألف آه
احكي يا قلبي..وانتي يا عيوني ابكي ودمعي
احكي عن جرحي..واللي بشوفه وبسمعه
ولا أقولك..احكي عن الخنجر المدفون جوه في أَضلعِي


سكت الكلام والقلب ويا العقل تاه
والدنيا مطرة ..وفي المطر نغسل ذنوبنا
وفي المطر ..نشيل الكره من بين قلوبنا
ندعي بعزم ما فينا..ياربنا نور دروبنا
وفي المطر..ميبانش مين دامع ومين مجروح
كله لربنا بهمه يبوح
ماهو في المطر...باب السما مفتوح


سكت الكلام والقلب ويا العقل تاه
والدنيا ضيقة تضيق علينا
تطير النوم من عينينا
تبعتر الحلم اللي فكر في يوم..يشوف الضلمة نور
فكر في يوم.. يعدي كل البحار وكل الجسور
لكن يا عيني الحلم زي القلب تاه
ماهو أصله كان مركب ورق..وسابحة ضد الاتجاه



سكت الكلام والقلب ويا العقل تاه
والدنيا ضلمة...وفي الظلام يصرخ جوايا صوت
مخنوق..نفسه مني يفوت
لكن لو خرج مني...يمكن أموت
وفي الظلام..بصيت لاقيت ..شمعة بعييييييييد بتبصلي
بتقولي قومي واحلمي..لاقيت ايديها بتتمدلي
بتمدلي نور الأمل..وسط الظلام بتبدده ..تكشفلي ألوان الحياه


سكت الكلام والقلب ويا العقل تاه
الدنيا بحر بين شطين
في البحر توهنا....فرقتنا سنين
في البحر موجة...طوحتنا بعيد
وموجبة من بعد موجة...خلاص بقينا ليها عبيد
وفضلنا نصرخ ...ندور على بر أمان أو حتى قارب نجاه
لكن الدنيا زي ماهي بحر بين شطين..
شط فيه الموت وشط فيه الحياه
سكت الكلام والقلب ويا العقل تاه

تعليقات

إرسال تعليق

لا تبخل برأيك

المشاركات الشائعة من هذه المدونة

حلم محلمتوش

-
صورة
ساعات ببان أقوى لكن بقوى على نفسي وبستقوى على حلمي اللي محلمتوش وبستقوى عليه يمكن يفوت مرة وينساني لكنه رغم أحزاني حلف هيكون في يوم مني  وأنا منه ....بعيد لكن في وجداني قريب جايز ....يقوي فيا إيماني يإني هكون  زي ما كنته  في حلمي اللي لسه محلمتوش
قراءة المزيد

أحلام هاربة

-
صورة
بقالي كتير جدا بعيد عن مدونتي وعارفة اني مقصرة معاها جامد إيقاع الحياة بقى سريع جدا.....  لدرجة إن الواحد مبقاش فاضي يقعد مع نفسه ولو خمس دقايق ....  بس رغم الايقاع السريع دا لسه جوانا أحلام ليها حق تاخد مساحة في خيالنا سواء كنا صاحيين او نايمين .....  أحلام مؤجلة مستحيلة أو قابلة للتحقيق .....  أحيانا يطغى عليك حلم على حلم تاني قديم .....  تهتم اوي بالحلم الجديد وتغذيه وترويه بالأمل والتفاؤل....  وفجأة تلاقي حلمك القديم بيلاعب أفكارك بس مش عشان ترويه لأ عشان تتحسر عليه لأنه بيضيع من بين ايديك .....  مش معنى انك تهتم بحلم جديد ان الحلم القديم يموت.....  حاول توازن بين أحلامك عشان تحقق أكبر قدر منها
قراءة المزيد

ماذا لو كان ما تبحث عنه لا يبحث عنك؟!

-
صورة
  يقال أن ما تبحث عنه يبحث عنك   كيف وقد أمضيت العقد والنصف من عمري وأنا أبحث لكن دون جدوى ونحن نموت في انتظار تلك الأشياء التي لم تحدث  وهذا الغريب الذي لم يهتدِ إلى السبيل  لحظات الانتظار والبحث هي كما نرى في رسم القلب  من مرتفعات نتيجة لخفقانه بشدة ؛نبحث بما أوتينا من عزم لكن سرعان ما يأتينا الخذلان بنشوة الانتصار  العمر يمر بسرعة الريح لا أفهم ماذا تعني تلك السنوات هذا العقد الذي مر ولم يغير من ملامحي شيئا  عندما أنظر إلى تلك المرآة لا أرى سوى تلك الفتاة التي لم تكبر بعد ؛لكن بنظري للآخرين أدرك أن الوقت يمر فالأطفال يشبون والشباب يشيخون أما عني فأنا لا أعترف بغير تلك الفتاة التي أراها في المرآة أدركت الآن أن العمر قد مر وأني ينبغي عليّ أن أتوقف عن البحث      ........ فما أبحث عنه لا يبحث عني  
قراءة المزيد