يوم فوق المعتاد

كعادتي دوما مع أي نشاط لأسرتي الحبيبة... أبتهج قبل حدوثه
وأصاب بنشوة هستيرية بعدها
أعشق كل ما بها....فقد وجدت ذاتي بوجودها
لكن اليوم يوم مختلف... أكتب عنه الآن لأني أعلم
بعد سنين سأجلس في يوم أمام صفحات المياه لأسترجعه مع صديقتي
لحظات كما الحلم...ساعات تحيينا
تفيقنا من ثبات كثبات أهل الكهف
أصبحت كمن وضع على أحهزة تنفس اصطناعية ومحاولات لانعاش القلب
فشلت كل تلك الأساليب .....سواها
نجحت تلك الساعات في إحيائي وبث الروح من جديد بداخلي
يوم سيظل بذاكرتي
يوم فوق المعتاد

ما عدت أبوح

انقطع لساني
ما عدت أبوح
وانقطع الأمل بشرياني
لكن ما زال يصيح
ويصيح ويطرد أحزاني
والحزن قبيح
ويثور الحزن على الآمال
وتعود وتسري أشجاني
والقلب قريح
وقطار الدمع يداهم وجناتي
ويثور بجنباتي صوت بركاني
لكن الصمت فحيح
دقات القلب تخفت في ألم
تهالك قلبي من ضخ الأحزان
والفرح شحيح
لحظات العمر تمر بلا معنى
كل منها يصرخ في ثورة
لجراحي تستبيح
تتراقص في عقلي أشباح للذكرى
تهوى الأشجان فتتركني
لفراش السقم طريح
أحيانا أبحث عن دنيا أخرى
عن عالم ليس بقاموسه لحزن مكان
فأجد الكون بريح
تأخذني الأيام الثكلى
ترميني بأحضان الأمس
فأعود جريح
لكن رياح الأمل تهب
فتردم أحزاني
فيصير الحزن ضريح

هي الحياه

هي الحياه...ودوما ستكون كذلك الحياه ماهي إلا طريق ..

قد يكون طويل أو قصير وذلك حسب ما هو مقدر لكل انسان من عمر

في هذا الطريق تجد الكثير من المطبات وهي ما يطلق عليه المعوقات الحياتية والمشاكل الطبيعية

كل منا يتخيل أنه الوحيد الذي خلقت من أجله تلك المطبات...لا يعلم أن أحدهم قد سبقه إليها ولكنه تجاوزها ... ولا يتخيل أن أحدهم سيمر عليها بعد قليل

ولست بملمة بالمهارات الخاصة بالقيادة...لكن من خبرات الطريق وبالفطرة التي فطرنا الله عليها...

نكتشف أنه من يندفع سريعا في طريقه متوهما أن هناك ما سيفوته إذا لم يسرع قدر استطاعتهعندما يندفع بطيش وجنون...حتما فإنه يقابل أحد تلك المطبات والتي تعوق سرعته الجنونية أو ربما تودي بحياته

لأنه لم يكن يخطط لها من البداية... لم يفكر إلا في كيفية تحقيق طموحه مهما كلفه ذلك الطموحأما عمن يعي فن القيادة...فإنه يسرع حين يرى أن الطريق ممهدا خاليا من النتوءات والحفر ويتروى عندما يرى أنه مقدم على أحد تلك المطبات فيتخطاها بكل سهولة بدون أدنى خسائر

ذلك هو من ينعم حقا برحلة سعيدة وغاية منشودة محققة

نحن في طريق الحياة لسنا سوى عابري سبيل.... نقف في محطات مختلفة لنتزود بما يعيننا على إكمال مسيرة الحياة..نقابل عابري سبيل آخرين... قد نتأثر بهم أو يتأثرون بنا

هناك من يشاركنا الطريق وفي منتصفه نكتشف انه لم يكن بنعم الرفيق...فنفترق بأمل في اللا لقاء


وهناك من تضعه مطبات الطريق في سبيلنا..لكي يكمل معنا السير لنكتشف أنه لم يكن سوى هذا التوأم الروحي الذي بمجرد التصاقه بك لا ينفصل عنك إلا للقاء آخر في حياتنا الآخرة...الأكثر صفاء ورخاء وطمأنينةبلا حمل وعبأ السفر والترحال


نصائح لسفر غير شاق:


تزود بالإيمان والتقوى وتحلى بالصبر والجلد

عامل الآخرين كما تحب أن تعامل


انثر بذور الحب والخير في طريقك ليجني من خلفك منها فتجد في نهاية الطريق قصر من الحب تسكنه ويسكنك

عيد ميلاد في يوم مش عادي

طبعا انا متأخرة جدا كالعادة
ومقصرة جدا كالعادة في حق الجميع طبعا

بس الصدمة مش مخلياني اعرف اتكلم :D

بعتذر للجميع على تقصيري

واعتذار خصوصي لمدونتي الصغنونة اللي تمت سنة من غير ما اعملها عيد ميلاد يليق بيها

لأن عيد الميلاد كان يوم تاريخي وكان باين عليه كده من سنة فاتت

إلا ان اليوم السنة دي كان تاريخي بجد

لأننا هنفضل نحتفل بيه لسنين قدام

مدونتي الصغنونة تمت سنتها الأولى في يوم مش عادي

فرح فيه كل المصريين

ورقصوا وغنوا



وده كان يوم



يوم



يوم





يوم التنحي 11/2/2011

كل سنة وانتو طيبين

وكل سنة وانتي طيبة يا مدونتي

ومن فرحة لفرحة ان شاء الله :)

وبالمناسبة السعيدة دي غيرت اللوك بتاع المدونة شوية

وبالمناسبة السعيدة دي أحب أشكر بشدة شخصين

أولهم
دعاء صاحبتي
مجرد حلم

لأنها شجعتني وحفزتني اني اعمل المدونة


وثانيهم

Timo

أول متابع ليا وأول واحد رد عليا وقالي على شوية ملاحظات كده
وأول واحد اداني أمل اني ممكن حد يقرالي


كل سنة وانتو طيبين يا جماعة :)

بنحبك يا بلادي

كلنا بنحبك يا بلادي
شباب الثورة
واللي مخرجوش المظاهرات
كلنا بنحبك يا بلادي
كل واحد له طريقته في حبك

كلنا هدفنا واحد
نبنيكي يا بلادي

كلنا ضد أي فساد وضد أي ظلم

كلنا نفسنا تبقي احلى بكتير أوي يا بلادي

عارفة يا بلادي
نفسنا نرفع راسنا جواكي وبراكي ونقول احنا من البلد دي

ايوة وقفنا كلنا
خوفنا اوي على البلد اوي
عرفنا كلنا يعني ايه مصر
وأخيرا بعد سنين عمرنا اللي معرفناش فيها لينا هدف واحد
كانت أعلام مصر مش بترفرف غير عشان الماتشات
دلوقتي كلنا هدفنا كبر
كلنا عايزين نبني ونعمر وننضف

كلنا مش هنشكك في بعض ولا هنخون بعض
كلنا هنبني مع بعض
كلنا هنشتغل بجد وهنراعي ربنا في كل نفس نتنفسه
عشان دم شهداءنا ميروحش هدر
دمهم هيفضل أمانة في رقابنا
عشان لو في يوم نسينا وخدتنا الدنيا واستشرى الفساد اللي احنا بنحاول نتخلص منه
لو في يوم ده حصل
لازم نفكر بعضنا بدمهم
اللي ماتوا عشان مصر تعيش

ماتوا عشان كانوا بيحبوا بلادي

احنا رايحين على فين؟؟

احنا رايحين على فين؟؟
سؤال بطرحه عليا وعلى كل مواطن وعلى كل مسئول وعلى كل واحد عايش في بلدنا دي

رايحين على فين

انا من بعد سنة ونص من الشغل والتعامل مع الجمهور

اكتشفت اكتشاف رهيب بجد
اكتشفت ان نسبة 90% من المجتمع دلوقتي بقى حرامية ونصابين ونشالين وشحاتين ومدمنين

والله محدش يقول اني ببالغ او اني مكتئبة
دي حقيقة ومحدش يقدر يشكك فيها

الانسان السوي الطبيعي دلوقتي يعتبر عملة نادرة في السوق

كل يوم بيعدي عليا بيثبتلي ان وجهة نظري صح
وانك المفروض تفترض سوء النية في التعامل مع أي بني ادم قدامك إلا أن يثبتلك عكس ذلك

النهارده كنت انا وزميلتي في الصيدلية موجودين عادي
وانا انشغلت عنها وعن الزباين بطلب طلبية من شركة ادوية
واذ بي أوفوجئ انها بعد ما الراجل مشي بتبص في المية جنيه اللي واخداها منه ومع الأسف الأسيف طلعت مزورة
انا طبعا الحركات دي معادتش تخيل عليا
بس هي عشان لسه جديدة في الكار فبلعت الطعم :(

دي حالة واحدة من ضمن مليون حالة بنقابلهم كل يوم

السؤال اللي طرحته في الاول احنا رايحين على فين؟
رايحين على فين في بلد الفساد انتشر واستشرى فيها في كل طبقات المجتمع؟
رايحين فين في مكان انا معتش بآمن فيه على نفسي وانا ماشية وسط الناس ان محدش هيحميني لو جرالي حاجة او هيجيب حقي لو حد اخده مني؟
رايحين فين في بلد اللي يمشي فيها صح ياخد فوق دماغه ويبقى هو الغلطان؟
رايحين فين في بلد بقى البني ادم الصح هو اللي شاذ ومش طبيعي؟

أنا بستغرب أوي على الناس اللي بتاكل من مال حرام وتشرب حرام وتلبس حرام وتركب حرام وتتغطى بحرام
ويناموا بالليل وبالهم مستريح

مش عارفين ان الكفن ملوش جيوب
وان الحرام ده هييجيلهم في اخرتهم ويتشووا بيه في مكان مش هينفع فيه ندم
مش عارفين انهم هييجوا في يوم ويقفوا وربنا يقتص منهم
مش بفلوس ولا بدهب ولا بفضة
لا بعملة واحدة هي الحسنات والسيئات

في النهاية
مش هقول غير حسبي الله ونعم الوكيل

لقاء المنصورة 31/12/2010

بنودع سنة جديدة وبنبدأ سنة جديدة
ورغم اني من كام ساعة كنت زهقانة ومكتئبة
إلا إني بعد هذا اليوم الفظيع الجميل اللذيذ الرايق جدا جدا
بقيت حاجة تانية خالص
واحنا بنستقبل سنة جديدة كان لازم نستقبل ضيوف لذاذ وعساسيل خالص مالص

اليوم ابتدا بمكالمة هاتفية بيني وبين دعاء عشان نتفق هنتقابل فين عشان نروح المؤسسة
واتقابلنا في المكان المتفق عليه ورحنا واستنينا الباقيين عند المؤسسة
استنينا شوية لحد ما بدأت الوفود تيجي من الصلاة

الوفود كلها بدأت تهل علينا
صبرني يارب
وزوجها أ/ رضا
وفاتيما الجميلة ...روح قلب ماما
أ/ خالد ...همس الأحباب
أ/ إيهاب....الطائر الحزين
باشمهندس أحمد ...أبو حميد
ابراهيم العدوي...كأني أتكلم
محمد متولي...بوكيه ورد
سارة...محاولات للبحث عني
أمجد القهوجي
سما...ليساندرا
حروف
محمد الغرباوي ...رحلة البحث
عبد الحميد ...مدونة الحياه
اسماء ...الحياه حفلة تنكرية وأختها
مصطفى...فك زنقة
غير الحضور اللي حضروا سلموا ومشيوا
ايمان...سما مصر
وميادة

وغير اللي اتصلوا


ودخلنا احنا مؤسسة البنات وطلعنا التبرعات
وكان فيه مشكلة جوة كده وشوشو قعدت تحجز وتهدي الأوضاع والأجواء
لحد ما المشاكل اتحلت
وسلمنا على البنات اللي نزلوا
وباركنا للعروسة اللي هتتجوز الشهر الجاي

وبعدين اتقسمنا وركبنا العربيات
وروحنا كأننا في زفة
وصلنا لبامبو
كان مكان جميل جدا
أول ما دخلنا دخلنا على المراجيح
اتمرجحنا شوية وشوفنا الكلاب الجميلة اللي جوة عينيها حزن فظيع
والمعيز النونو الصغنونو
الجو كان ساحر جدا رغم برودة الجو لكن دفء اللقاء غطا على برودة الجو



بعدين دخلنا جوة وكلنا انتشرنا في المكان وقعدنا نصور
واول ما الكيك ظهر كلنا هجمنا عليه حتتك بتتك
وبعد ما الكل اخد صور في هذا المكان الفظيع الجميل
وبعدين دخلت انا ودعاء نصلي في اوضة البلياردو واستغلينا الظروف واتصورنا مع الترابيزة ودعاء دخلت كورة جون :D

بدأنا نجمع بعض حول ترابيزة واحدة
اتكلمنا عن مؤسسة الولاد وازاي ان الاهتمام بيها يكاد يكون معدوم وانهم دايما مظلومين على حساب البنات
واتناقشنا في نقطة انهم لما بيوصلوا لسن 18 سنة بيلاقوا نفسهم مشردين ومعاهم مبلغ من المال بيضيعوه ويرجعوا تاني للمؤسسة
بعدين بدأنا نتعرف على بعض بأسماء المدونات
واستنينا الاكل ييجي
كلنا جه لينا الأكل إلا الجماعة بتوع القاهرة اللي كانوا جعانين من بدري
وبدأوا يدوروا على معونات خارجية لكن للأسف مفيش أي معونات من أي مكان لأننا في مكان بعيد عن العمار
وعشان كده أصحاب المكان كانوا مطمئنين

بعد ما خلصنا اكل نزلنا ناخد جولة مع كريمة :D
طبعا انا بتفرج بس
دعاء أول واحدة جربت تركب كريمة بس كريمة كانت بتهنج في النص وتفضل واقفة ونفضل نقرالها قرآن ونسمي عشان تتحرك
بعدين ركبت اسماء واختها ومصطفى
وبعدها ابراهيم ركب ولما جه ينزل رجله اتشبكت
ودخل مصطفى يحاول يفك الاشتباك قامت نضارته اتكسرت

بعدين جاء المسئول عن كريمة ودعاء قالتله انها بتهنج مننا قالها اركبي وقام مطلع الخرزانة
خافت منه وطلعت تجري زي المتهورة
بس ربنا ستر ودعاء بمنتهى الحنكة سيطرت على الموقف

وبعد ما خلصنا جولة الفروسية
دخلنا جوة لاقينا المكان ساحر جدا وقلنا نقعد سوا نتكلم

وناكل الكيك بتاع صبرني اللي كان بجد تحفة وملوش مثيل
قعدنا كلنا واتكلمنا وسمعنا أمجد اللي كان هيودينا في داهية إلا إنه وضح المعاني اللي ورا كلماته :D
وسمعنا خاطرة جميلة لأ/ايهاب الطائر الحزين

وبعدين ودعنا جماعة القاهرة اللي بجد نورونا جدا جدا واتبسطت اني شوفتهم بخفتهم وروحهم الجميلة اللي سيطرت على المكان

وبعدين احنا البنات ركبنا مع دعاء وربنا ستر ووصلنا للأهداف المنشودة بعد حادثة الكوبري المشهورة :D

وصلنا سما وسارة واتطمنا عليهم انهم ركبوا
وشوشو وصلناها وبعدين انا ودعاء كملنا
وطول مانا معاها اقولها دعاء افتكري اني معاكي
عشان دايما بتنسى اني معاها وبتقوم مروحة البيت عندها وتسيبني معاها في العربية :D
وصلت البيت وانا كلي سعادة
بجد مستمتعتش بيوم زي ده من زماااااااااان
ويمكن فعلا كان أجمل يوم في 2010
كان ختامها مسك

أولا أحب أشكر صبرني ومحمد اللي بجد تعبوا جدا عشان اللقاء يظهر بالجمال اللي كان فيه

صبرني...صاحبة الكيك الجميل
تسلم ايديكي على الكيك وعلى اليوم الجميل جدا
وان شاء الله نتجمع في الخير دايما
وسلامنا لأ/ رضا

فاتيما...جميلة ودمك خفيف ودخلتي قلبي على طول

سارة...بجد اتبسطت اني شوفتك تاني وعرفتك عن قرب اكثر

سما...صاحبة ال 160 صورة :D
رقيقة جدا كالعادة وبحس انك عاقلة كده

اسماء ...ربنا يوفقك في الامتحانات
سيبي النت شوية بقى وقومي زاكري

دعاء...صاحبتي من قديم الأزل فمش هقول كلام يعني
ربنا يخليكي ليا يا دودو :)


الشباب بقى
أ/ خالد... خفة دم ملهاش مثيل سمعت عنها من زمان بس مصدقتش غير لما شفت بنفسي :)

م/ أحمد و أ/ إيهاب
نورتونا وان شاء الله تنورونا تانى

محمد متولي...خدوم وجدع ..حسيت انه The Godfather

ابراهيم...غلبان يا عيني والناس كلها بتيجي عليه

مصطفى...هادي جدا جدا زيي بالزبط :D

أمجد...أول ما بشوفه بعرف اننا في لقاء مدونين :D

محمد الغرباوي...حسيت انه مش في الفورمة


بجد بشكركم كلكم جدا على اليوم الفوق رائع ده