أحلام هاربة

بقالي كتير جدا بعيد عن مدونتي وعارفة اني مقصرة معاها جامد إيقاع الحياة بقى سريع جدا.....
 لدرجة إن الواحد مبقاش فاضي يقعد مع نفسه ولو خمس دقايق ....
 بس رغم الايقاع السريع دا لسه جوانا أحلام ليها حق تاخد مساحة في خيالنا سواء كنا صاحيين او نايمين .....
 أحلام مؤجلة مستحيلة أو قابلة للتحقيق .....
 أحيانا يطغى عليك حلم على حلم تاني قديم .....
 تهتم اوي بالحلم الجديد وتغذيه وترويه بالأمل والتفاؤل....
 وفجأة تلاقي حلمك القديم بيلاعب أفكارك بس مش عشان ترويه لأ عشان تتحسر عليه لأنه بيضيع من بين ايديك .....
 مش معنى انك تهتم بحلم جديد ان الحلم القديم يموت.....
 حاول توازن بين أحلامك عشان تحقق أكبر قدر منها

حلم الشهيد

لساك يا قلبي بتدور على الحلم
اللي مات جواك من مية سنة
لساك بتسأل مين أنا
لساك تتهته في الكلام
لساك بتحبي وفي المنام....
... تطير مع سرب الحمام
لساك يا حلم متداري في حضن الالم
لساك بتصرخ من سكات كما الصنم
لساك بتصرخ م الأنين...
وتقول كان يوم وعدا....وياه سنين
مشتاق يكون لك يوم صدا
تقسم برب الناس...مهما طال بيك المدى
لاجل التراب...هتموت فدا
هتموت عريس وفي حضنك الضحكة مستشهدة