السبت، 27 مارس، 2010

استقالة من الحياه





لأنه كان برئ أوي ...انسان بجد...
ميوقفوش عن قولة الحق المبين ولا أي سد
ملامحه مليانة عطف
وعينيه مليانة ببراءة مشفتهاش في أي حد
كان كل يوم يصبح عليا بابتسامة حنينة
ويقولي صباحو ورد

حلمه دايما كان بسيط
يحلم ببيت
يضمه هو وحبيبته...وعيلين بنت وولد
كانت حبيبته بسيطة جدا ....مش ملكة جمال
لكنه كان بيحبها حب ولا في الخيال

أنا لما كنت أشوفهم ...أفتكرهم عصفورين بيزقزقوا
ويغنوا أحلى مقطوعة موسيقية سمعتها
ويطيروا فوق في السما ويحلقوا
مكنوش ساعتها مؤمنين إن الحياه سهل تبني أحلام وسهل تهدها

كانت كتير بتقوله خايفة تضمني في البرد أشعر بالدفا
وأما أتجرح تلمس إيديا إيديك أحس بالشفا
خايفة في يوم ألاقيك حلم وويا الريح راح واختفى

مكنش فاهم وقتها إن الحياه بتديله الإشارة
يبعد عن الحلم اللي عاش وياه أوي
يبعد لأنه راح ينتهي حتما بالخسارة

لكنه عاش الحلم وفعلا صدقه
وأخيرا اشتروا بيت محندق حندقة
واتلم شمل العصفورين وعلٍي صوت الزقزقة

وفي لحظة كانت الحياه مستنية
هدت العش الجميل
وراحت العصفورة وماتت الأمنية
وخلاص بقى...سكتت خلاص الأغنية
والأمنيات صبحوا سكات
والزقزقات صبحت آهات
والحلم.........الحلم مات

صعبة أوي...بقت الحياه
ولأنه مش قادر يلاقي سفينة نوح ولا طوق نجاه
استسلم خلاص ...سلم حياته للإله
ما خلاص... جاب آخر طريقه ومنتهاه

وعشان كده طلب استقالة من الحياه
يمكن يلاقي في آخرته حلمه اللي تاه

هناك 6 تعليقات:

  1. انا مش فاهمة قصدك يعني هي اتوفت ولا خانته وسابته
    المهم في الحالتين لا ييأس من روح الله الا الكافرون

    ردحذف
  2. السلام عليكم..

    ربما نتعثر مرة..ونفشل في تحقيق حلم لكن أن نقفـ ولانكمل المشوار..فذا أعتقده خطأ !!

    علمًا بأننا في الدنيا قد لانحقق شيئ مما نتمناه..فقط لأنها الدنيا..وماعند الله خير وأبقى.

    ـــــــــــــــ

    اما عن الحلم نفسه..فهو جميل والكل يتمناه-شخصيًا اتمناه- وأرجواْ أن يتحقق عاجلًا وليس آجلًا ..!


    لكن هل ماتت بطلة قصتنا ام .......!!

    تحياتي.

    ردحذف
  3. السلام عليكم
    اتأثرت بيها اوي اد ايه احلامه بسيطه وكله حب ووفاء وحسيت اني عايزه ابكي
    ياريت تشيلي النقطه الي تحت حلمه لانها لخبتطني وبعدين حاجه جميله زي دي خساره يكون فيها غلطه

    جلمه دايما كان بسيط

    دومتي مبدعه

    ردحذف
  4. معلش هعمل كومينت كمان واقولك هي فعلا العصفوره راحت فين هو النهايه تحفه بس ده حب استطلاع
    وقوليلوه انه وفي اوي وحساس وبلاش يأس والدنيا هتنور تاني لان ربنا ببرائته دي اكيد هيعوضه

    ردحذف
  5. مين اللى بيمضى الاستقالات دى؟

    ردحذف
  6. just waiting:
    هي البطلة ماتت جوة البيت نتيجة لاهمال في المباني الجديدة وأساساتها ومطابقتها للمواصفات

    وفعلا لا ييأس من روح الله إلا القوم الكافرون

    مشخبطاتي
    الفكرة مش في ان تحقيق الحلم صعب أو انه مش عايز يكمل عشان تعثر
    لكن عشان فقد حبيبته وزوجته
    فاختار النهاية السريعة

    القمر الباكي
    شكرا لملحوظتك وغيرت المشاركة
    وشكرا لردك الجميل
    بس القصة مستوحاه من خيالي
    ولا تمت للواقع بأي صلة
    والعصفورة ماتت والعش اتهد

    حلم بيعافر
    اللي بيمضي الاستقالات
    اممممممممممممممم
    ربنا هو اللي بإيده كل شئ

    ردحذف

لا تبخل برأيك