احنا رايحين على فين؟؟

-




احنا رايحين على فين؟؟
سؤال بطرحه عليا وعلى كل مواطن وعلى كل مسئول وعلى كل واحد عايش في بلدنا دي

رايحين على فين

انا من بعد سنة ونص من الشغل والتعامل مع الجمهور

اكتشفت اكتشاف رهيب بجد
اكتشفت ان نسبة 90% من المجتمع دلوقتي بقى حرامية ونصابين ونشالين وشحاتين ومدمنين

والله محدش يقول اني ببالغ او اني مكتئبة
دي حقيقة ومحدش يقدر يشكك فيها

الانسان السوي الطبيعي دلوقتي يعتبر عملة نادرة في السوق

كل يوم بيعدي عليا بيثبتلي ان وجهة نظري صح
وانك المفروض تفترض سوء النية في التعامل مع أي بني ادم قدامك إلا أن يثبتلك عكس ذلك

النهارده كنت انا وزميلتي في الصيدلية موجودين عادي
وانا انشغلت عنها وعن الزباين بطلب طلبية من شركة ادوية
واذ بي أوفوجئ انها بعد ما الراجل مشي بتبص في المية جنيه اللي واخداها منه ومع الأسف الأسيف طلعت مزورة
انا طبعا الحركات دي معادتش تخيل عليا
بس هي عشان لسه جديدة في الكار فبلعت الطعم :(

دي حالة واحدة من ضمن مليون حالة بنقابلهم كل يوم

السؤال اللي طرحته في الاول احنا رايحين على فين؟
رايحين على فين في بلد الفساد انتشر واستشرى فيها في كل طبقات المجتمع؟
رايحين فين في مكان انا معتش بآمن فيه على نفسي وانا ماشية وسط الناس ان محدش هيحميني لو جرالي حاجة او هيجيب حقي لو حد اخده مني؟
رايحين فين في بلد اللي يمشي فيها صح ياخد فوق دماغه ويبقى هو الغلطان؟
رايحين فين في بلد بقى البني ادم الصح هو اللي شاذ ومش طبيعي؟

أنا بستغرب أوي على الناس اللي بتاكل من مال حرام وتشرب حرام وتلبس حرام وتركب حرام وتتغطى بحرام
ويناموا بالليل وبالهم مستريح

مش عارفين ان الكفن ملوش جيوب
وان الحرام ده هييجيلهم في اخرتهم ويتشووا بيه في مكان مش هينفع فيه ندم
مش عارفين انهم هييجوا في يوم ويقفوا وربنا يقتص منهم
مش بفلوس ولا بدهب ولا بفضة
لا بعملة واحدة هي الحسنات والسيئات

في النهاية
مش هقول غير حسبي الله ونعم الوكيل

تعليقات

  1. Test5 يناير 2011 في 5:07 ص

    سألتى احنا رايحين فين ؟؟

    انا عن نفسى هنط من المركب الغرقانة ان شاء الله وقت ما أقدر أنط

    "رايحين فين في مكان انا معتش بآمن فيه على نفسي وانا ماشية وسط الناس ان محدش هيحميني لو جرالي حاجة او هيجيب حقي لو حد اخده مني؟"

    الجملة دى كان نفسى أقولها لكل حد بيقول أمريكا و أوروبا الواحد ما يآمنش على نفسه إنما مصر الأمان

    بجد أنا ناوى أخلع فى أقرب فرصة و كمان مش ناوى أرجع ، أعلم ولادى التعليم دا ليه ، أسيب بنتى تمشى فى شوارعنا دى ليه و انا نفسى مش مطمن على نفسى

    بجد كل اللى يلاقى فرصة للهرب .... يهرب

    دا أنسب وقت للى عايز يهرب

    ردحذف
  2. Tamer Moghazy11 يناير 2011 في 3:03 ص

    وجعني سؤالك قوووي..
    "احنا رايحين على فين"
    اصل الموضوع مش مستقبل لسه ها نروحه..
    ده للاسف بقى واقع واحنا لامسينه..
    احنا فعلا في الطريق..
    يعني بدانا وبقينا في نص الطريق بالفعل..!!

    ردحذف

إرسال تعليق

لا تبخل برأيك

المشاركات الشائعة من هذه المدونة

حلم محلمتوش

-
صورة
ساعات ببان أقوى لكن بقوى على نفسي وبستقوى على حلمي اللي محلمتوش وبستقوى عليه يمكن يفوت مرة وينساني لكنه رغم أحزاني حلف هيكون في يوم مني  وأنا منه ....بعيد لكن في وجداني قريب جايز ....يقوي فيا إيماني يإني هكون  زي ما كنته  في حلمي اللي لسه محلمتوش
قراءة المزيد

أحلام هاربة

-
صورة
بقالي كتير جدا بعيد عن مدونتي وعارفة اني مقصرة معاها جامد إيقاع الحياة بقى سريع جدا.....  لدرجة إن الواحد مبقاش فاضي يقعد مع نفسه ولو خمس دقايق ....  بس رغم الايقاع السريع دا لسه جوانا أحلام ليها حق تاخد مساحة في خيالنا سواء كنا صاحيين او نايمين .....  أحلام مؤجلة مستحيلة أو قابلة للتحقيق .....  أحيانا يطغى عليك حلم على حلم تاني قديم .....  تهتم اوي بالحلم الجديد وتغذيه وترويه بالأمل والتفاؤل....  وفجأة تلاقي حلمك القديم بيلاعب أفكارك بس مش عشان ترويه لأ عشان تتحسر عليه لأنه بيضيع من بين ايديك .....  مش معنى انك تهتم بحلم جديد ان الحلم القديم يموت.....  حاول توازن بين أحلامك عشان تحقق أكبر قدر منها
قراءة المزيد

ماذا لو كان ما تبحث عنه لا يبحث عنك؟!

-
صورة
  يقال أن ما تبحث عنه يبحث عنك   كيف وقد أمضيت العقد والنصف من عمري وأنا أبحث لكن دون جدوى ونحن نموت في انتظار تلك الأشياء التي لم تحدث  وهذا الغريب الذي لم يهتدِ إلى السبيل  لحظات الانتظار والبحث هي كما نرى في رسم القلب  من مرتفعات نتيجة لخفقانه بشدة ؛نبحث بما أوتينا من عزم لكن سرعان ما يأتينا الخذلان بنشوة الانتصار  العمر يمر بسرعة الريح لا أفهم ماذا تعني تلك السنوات هذا العقد الذي مر ولم يغير من ملامحي شيئا  عندما أنظر إلى تلك المرآة لا أرى سوى تلك الفتاة التي لم تكبر بعد ؛لكن بنظري للآخرين أدرك أن الوقت يمر فالأطفال يشبون والشباب يشيخون أما عني فأنا لا أعترف بغير تلك الفتاة التي أراها في المرآة أدركت الآن أن العمر قد مر وأني ينبغي عليّ أن أتوقف عن البحث      ........ فما أبحث عنه لا يبحث عني  
قراءة المزيد