ما زال البحث جارٍ

بسم الله الرحمن الرحيم أولا كل سنة وانتو طيبين وان شاء الله رمضان يكون جميل ومبارك عليكو دايما يارب وكلنا نستغله أحسن استغلال ثانيا: بعتذر اعتذار شديد مبالغ فيه لكل المدونين اني بطلت اتابعكو شوية بس غصب عني والله فترة من الانشغال اوي بعد ما بقيت موظفة :D وفترة من التخبط اوي شدة وتزول ان شاء الله :) ثالثا بقى وده الأهم ومسك الختام كلنا في رمضان بنقرأ القرآن " مش معنى كده اننا مش بنقراه في باقي الشهور....بس الأكتر وأشد حرصا على قرايته بنكون في رمضان" وكمان كلنا بنشوف برامج دينية او بنسمع أو بنقرا معلومات دينية وكمان بنروح نصلي التراويح أكيد فيه حاجات بتأثر في نفس كل واحد فينا وبما اننا في أيام جميلة ومفترجة ليه منشاركش بعض في الحاجات دي معلومة جديدة سمعتها أو حتى معلومة قديمة أو آية سمعتها ومع انك بتسمعها على طول أثرت فيك اوي النهارده بالذات أو موقف من السيرة النبوية او سيرة الصحابة قريته او سمعته في برنامج وعجبك تعالوا نشارك بعض في الحاجات دي عشان نفكر بعض وذكر فإن الذكرى تنفع المؤمنين